PAKIKO NASHON NAN TA FAYA?

Resientemente, 3 ekonomista (Daron Acemoglu, Simon Johnson i James Robinson) a haña Premio Nobèl pa nan investigashon kon karakter  di institushonnan ta yuda splika dikon algun pais ta bira riku i otro ta keda pober. Un tema interesante di ekonomia, p’esei mi a disidí pa skirbi un artíkulo riba dje. E tema tambe ta relashoná ku Gobernashon, un di e tópikonan ku mi ta dediká tempu pa skirbi tokante dje i tambe duna masterklas.

E Komité Nobèl a elogiá e tresnan pa splika dikon “sosiedatnan ku un mal gobernashon di lei i institushonnan ku ta eksplotá su poblashon, no ta generá kresementu òf kambia pa mihó.”

Dikon algun nashon ta pober i otro riku?

Dikon algun nashon ta gosa di prosperidat mientrastantu otro ta keda den gara di pobresa? E pregunta aki ta un pregunta ku pa hopi aña ta kousa hopi debate , teoria  ekonómiko i diskushon  polítiko. Aunke tin hopi faktor ku ta kontribuí na e rikesa òf pobresa di nashonnan, e trabounan di Daron Acemoglu, Simon Johnson, i James Robinson—espesialmente den nan buki “Why Nations Fail” —ta duna un marko di trabou inovativo pa komprondé e asuntu akí. E ekonomistanan ta argumentá ku e motor prinsipal di prosperidat òf pobresa di un nashon ta e karakter di nan institushonnan. Segun e ekonomistanan aki, institushonnan inklusivo ta trese rikesa, mientrastantu institushonnan ku ta ekstrahe ta trese pobresa.

Den e blòg aki, lo mi bai den mas detaye riba nan ideanan, investigando motibunan ekonómiko, polítiko, i históriko dikon algun nashon a desaroyá ekonomia riku, mientrastantu otro ta keda atras. Mi lo laga e lesadó di e blòg aki pensa riba ki tipo di institushon, mekanismo polítiko i ekonómiko nos tin na Kòrsou i si esaki ta un di e kousanan di nos situashon sosioekonómiko aktual.

E Importansia di institushon

E argumento sentral ku Acemoglu, Johnson, i Robinson ta proponé ta ku institushonnan—tantu polítiko komo ekonómiko—ta e determinante esensial di e prosperidat di un nashon. Nan trabou ta desviá for di teorianan mas bieu ku a pone énfasis riba geografia, kultura, òf liderato individual komo e faktor prinsipal ku ta stimulá kresementu ekonómiko. En bes di esaki, nan ta enfoká riba e struktura i diseño di e institushon di un pais.

Nan ta hasi un distinshon importante entre dos tipo di institushon: inklusivo of ku ta ekstrahe.

E raisnan históriko di rikesa i pobresa

Un di e aspekto nan mas interesante di e trabou di Acemoglu c.s. ta kon nan ta splika e raisnan históriko di institushon i nan efekto a largu plaso riba desaroyo nashonal. Nan investigashon ta mustra ku e orígen di institushon aktualmente ta  bѐk te na eventonan i desishonnan históriko ku a keda ku konsekuensia duradero.

E legado di kolonialismo

Kolonialismo a hunga un papel signifikativo den e formashon di institushonnan di hopi pais moderno. Segun teoria di e 3 ekonomistanan, e tipo di kolonialismo ku e podernan Europeo a imponé, tabata determiná si un nashon lo keda ku institushon inklusivo òf ku ta ekstrahe .

Na regionnan kaminda kolonisadónan europeo por a biba na un manera kómodo, manera Estádos Unídos, Canada, i Australia, e kolonisadó a establesé institushon inklusivo. Esnan ku a bira independiente tabata kontinuá ku e institushonnan aki, ku eventualmente a sirbí komo e fundeshi di nan prosperidat modѐrno.

En kontraste, na regionnan kaminda kolonisadó europeo tabatin un kantidat haltu di mortalidat—manera hopi parti di Afrika, Latino-Amerika i parti di Asia—kolonisadó a establesé institushon eksplotativo, diseñá pa eksplotá e poblashon lokal i nan rekursonan (saka slá mas lihé posibel). Podernan europeo a imponé strukturanan sentralisá i outoritario ku tabata permití nan saka rikesa sin invertí den desaroyo lokal. Despues ku e paisnan aki a haña independensia, e élite lokal ku a tuma poder for di e  kolonisadó nan, a kontinuá òf hasta intensifiká e naturalesa di ekstrakshon di e institushonnan, ku a prevení desaroyo ekonómiko duradero.

Un aspekto interesante di nan teoria ta loke Acemoglu i su ko-outornan ta yama “reversal of fortune” (kambio di fortuna). Nan ta mustra ku hopi regionnan ku tabata riku promé ku kolonialismo, manera India i Latino-Amerika, awe ta relativamente pober, mientrastantu regionnan ku tabata relativamente pober promé ku kolonialismo, manera Norte Amérika i Australia, awe ta riku. Nan ta splika ku esaki ta relashoná ku e institushonnan ku a ser imponé durante kolonialismo. Kaminda a establesé  institushon inklusivo , e sosiedatnan ei a bira riku; kaminda a establesé institushon ku ta ekstrahe , pobresa a persistí.

Dikon nashonnan no ta kambiá?

Mirando ku institushon inklusivo ta promové prosperidat, bo por puntra dikon nashonnan ku tin institushon ku ta ekstrahe no simplemente a reformá nan sistema. Dikon élite den e paisnan aki no ta kambia e sistema pa benefisiá e mayoria?

Acemoglu c.s., ta argumentá ku e problema ta den e dinámika polítiko ku ta sostené e institushon ku ta ekstrahe. Esnan ku tin poder bou di régimen ku ta ekstrahe no tin mashá ánimo pa kambiá e sistema, pasobra nan ta haña benefisio enorme for di e rikesa ku nan por ekstraé for di e resto di sosiedat. Reformanan ku lo yega na institushon inklusivo lo redusí nan poder i rikesa, loke ta hasi ku nan no tin intenshon pa implementá tal kambio.

Den hopi kaso, e élite ta resistí aktivamente e reformanan, a kosto haltu pa desaroyo ekonómiko a largu plaso. Nan por limitá aksesibilidat na enseñansa, reprimí inovashon i usa violensia pa suprimí oposishon; tur esaki pa mantené e status quo. E resultado ta un sirkulo visioso den kua institushon ku ta ekstrahe ta persistí i stagnashon ekonómiko ta kontinuá. E ta zona “bekend”?

Momentonan krítiko i e ròl di revolushon

Aunke institushon ku ta ekstrahe ta bastante resistente pa kambio, Acemoglu, Johnson, i Robinson ta sostené ku momentonan krítiko—momentonan di krísis òf kambio signifikante—por duna oportunidat pa nashonnan kambia di institushon ku ta ekstrahe pa mas inklusivo. Guera, revolushon, krísis ekonómiko òf e kolapso di un régimen, por krea espasio pa reformanan ku den situashon “normal” lo no ta posibel.

Por ehèmpel, e Revolushon di 1688 na Inglatera tabata un momentu krítiko ku a hiba na e formashon di institushonnan polítiko mas inklusivo. E revolushon aki a limitá e poder di monarkia i a establesé un sistema di balanse di poder, preparando e tereno pa e Revolushon Industrial i pa e eventual kreashon di Gran Bretaña komo un potensia ekonómiko global.

Mesun kos, e kolapso di e Union Soviétiko den 1991 a krea un momentu krítiko pa nashonnan di Europa Oriental, di kua hopi a kambia for di régimen komunista ku ta ekstrahe pa institushon nan polítiko i ekonómiko mas inklusivo.

Sinembargo, no tur momentu krítiko ta resultá na kambio positivo. E outornan tambe ta indiká ehèmpel kaminda revolushon òf krísis a reforsá institushon ku ta ekstrahe na lugá di remplasá nan. Por ehèmpel, e Primavera Árabe a kousa ku hopi régimen outoritario a kai, pero den hopi kaso, élite nobo ku ta ekstrahe a subi na nan lugá i prevení e formashon di institushon inklusivo i desaroyo ekonómiko.

Geografía, kultura i otro faktornan

Aunke e outornan di “Why Nations Fail “ ta pone institushon den  sentro di nan análisis, nan no ta deskonosé kompletamente otro faktornan manera geografia i kultura. Nan ta argumentá ku e elementonan akí por influensiá e tipo di institushon ku ta surgi, pero nan no ta e final determinante  di e rikesa òf pobresa di un nashon.

Por ehèmpel, geografia por forma e ekonomia dor di determiná aksesibilidat na ruta di komèrsio òf rekursonan natural, pero e rikesa derivá for di esaki lo dependé ainda di e institushon ku ta na lugá. Un pais ku institushon eksplotativo lo no usa su rekursonan natural pa benefisiá e poblashon general, mientrastantu un pais ku institushon inklusivo lo haña manera pa usa e rekursonan aki pa stimulá kresementu ekonómiko general.

Kultura tambe, por hunga un papel den formashon di institushon, pero e no ta determinante. Aunke sierto balornan kultural, manera un étika di trabou fuerte òf konfiansa den otro, por apoyá e desaroyo di institushon inklusivo, kultura no ta státiko i por kambiá ku tempu. E outornan ta argumentá ku kultura hopi biaha ta evolushoná mas komo reakshon riba e institushon nan eksistente, na lugá di ta e motor prinsipal di e resultadonan ekonómiko.

E ròl di ayudo internashonal i intervenshon di otro nashon

Un otro aspekto importante di nan análisis ta e ròl di intervenshon di otro nashon den formashon di institushon. Acemoglu, Johnson i Robinson ta kritiko ku programanan di ayudo internashonal ku ta intentá pa imponé reformanan ekonómiko sin ataká e institushon nan polítiko ku ta na rais di e problema. Nan ta argumentá ku intervenshon asina ta generalmente faya pasobra nan no ta kambia e naturalesa eksplotativo di e sistema polítiko. Nos por argumentá aki e ròl ku Hulanda ta hunga den e desaroyo di institushonnan di Kòrsou (i pa esaki  èks -Antilia Hulandes) dor di su programanan di ayudo finansiero i tékniko.

Por ehèmpel, ayudo internashonal por duna fondo pa proyektonan di infrastruktura òf enseñansa, pero si e élite polítiko den un pais ta kontinuá saka rikesa pa nan mes, lo no por repartí e benefisio di e programanan akí no lo pa komunidat. Den algun kaso, ayudo internashonal por hasta reforsá institushon ku ta ekstrahe dor di duna rekursonan ku e élite por usa pa mantené nan poder.

Mesun kos , intervenshon dor di otro nashon ku ta intentá imponé demokrasia òf reformanan di merkado sin manehá a fondo. e dinámika polítiko, lo no tin éksito. E outornan ta indiká ehèmpel manera Irak i Afganistan, kaminda esfuersonan pa krea sistema polítiko nobo via intervenshon di otro nashon, no a hiba na formashon di institushon inklusivo òf desaroyo ekonómiko a largu plaso.

I despues…

Resumiendo, e trabou di Daron Acemoglu, Simon Johnson i James Robinson ta duna un marko di trabou pa komprondé dikon algun nashon ta riku i otro ta pober. Nan enfoke riba e ròl di institushon—si e ta inklusivo òf ku ta ekstrahe —ta duna un splikashon komprendibel pa e patronchi  global di rikesa i pobresa ku nos ta mira awe.

Aunke geografia, kultura i otro faktornan por influensiá e desaroyo di un nashon,  ta e naturalesa di su institushon polítiko i ekonómiko finalmente ta determiná si e ta eksitoso òf faya. Paisnan ku institushon inklusivo por usa e talento i energia di nan hendenan, loke ta resultá den kresementu ekonómiko sostenibel i di prosperidat. Di otro banda , paisnan ku institushon ku ta ekstrahe ta keda atrapá den sírkulonan di pobresa, pasobra e élite ta sigui ekstraé rikesa riba kuenta di e poblashon.

Komprondé e dinámika aki ta esensial pa akshonistanan polítiko, ekspertonan i kualkier persona ku ta interesá den promové desaroyo global. Aunke kambio di institushon ta un proseso kompliká i hopi biaha difísil, e investigashon di Acemoglu, Johnson, i Robinson ta duna klaridat balioso kon e kambio por tuma lugá i dikon e ta asina importante. E splikashon aki mester duna nos motibu pa reflekshoná riba nos mes situashon na Kòrsou. En todo kaso, un herensia kolonial nos tin sigur. E promé pregunta ta: ki tipo di institushon nos tin? Mi ke referí tambe na un blòg anterior (O-1) “KAOS TA UN TRAPI”.

Dieudonne (Neetje) van der Veen ta un konsultant di maneho finansiero. Su trabou i eksperensia ta konsentrá prinsipalmente riba e tereno di maneho finansiero i struktura di empresanan den nesesidat i Gobernashon den siklo di Planifikashon i Kontrol.

Van der Veen tin un máster den ekonomia di negoshi (Erasmus Universidat Rotterdam), ta un akountent sertifika (NBA), un CFE (Examinador Sertifiká di Fraude) i un CICA (Auditor Sertifiká di Kontrol Interno).

Un danki na Percy Pinedo pa e sosten ku papiamento.